ГРЦИЈА И БУГАРИЈА НЕ ГИ ПОЧИТУВААТ ПРАВАТА НА МАЛЦИНСТВАТА

Стразбур, 21 септември (МИА) - Грција и Бугарија перманентно не ги почитуваат меѓународните стандарди што се однесуваат на човековите права и на заштитата на етничките и јазичните малцинства и продолжуваат да ја користат историски базирана пропаганда како оправдание за нивниот непријателски став кон македонското малцинство. Ова, како што се наведува во соопштението на партијата на македонското малцинство во Грција „Виножито“, се заклучоците од истражувачката регионална мисија на европската парламентарна политичка партија Европската слободна алијанса (ЕФА), спроведена минатата недела.
Мисија беше предводена од каталонскиот европратеник и заменик-претседател на ЕФА Бернат Жоан и Мари и партискиот кодиректор Гинтер Даувен.
Жоан и Мари на прес-конференцијата одржана во Лерин по средбата на делегацијата на ЕФА со грчките локални власти нагласи дека е неприфатливо и контрапродуктивно и натаму да се порекнува постоењето на македонското национално малцинство во Грција и да не се признава неговиот јазик. Тој ја повика Грција да организира попис на кој ќе им дозволи на Македонците во Грција слободно да го декларираат своето етничко, јазично и културно потекло.
Жоан и Мари, кој е член на Комитетот за култура во Европскиот парламент и социолингвист по професија, потенцира дека македонскиот јазик треба да се признае како посебен јазик, а на македонското малцинство треба да му се овозможи негово слободно користење. Тој нагласи оти е крајно време да се „тргне товарот кој се наметна со грчката опсесија со спорните историски факти и да се погледне кон иднината“.
„Виножито“ соопштува дека претставниците на ЕФА имале можност да бидат сведоци на однесувањето на Грција кон македонското малцинство за време на состанокот со високи функционери од Министерството за надворешни работи и со универзитетски професори во Солун. Имено, како што нагласува во соопштението, делегацијата на ЕФА во Грција допатувала на покана на „Виножито“, но на претставниците на таа партија не им било дозволено да присуствуваат на состанокот поради немање лични покани. „Виножито“ нагласува дека ваквата постапка била дел од грчката политика која цели да се избегне каков било директен дијалог со Македонците.
Истражувачката мисија на ЕФА беше и во Пиринскиот регион на Бугарија, каде живее македонското малцинство во таа земја.
Гинтер Даувен нагласи дека положбата на македонското малцинство во Бугарија е слична како онаа во Грција. Тој напомена дека Бугарија не го признава постоењето на македонско национално малцинство и неговиот јазик и поставува најразлични препреки за учество на избори на партија што би го претставувала. Даувен додаде оти последен таков обид е барањето од пет илјади потписи за регистрирање на политичка партија, наместо досегашните 500.
Стојан Георгиев, заменик-претседателот на партијата на македонското малцинство во Бугарија, ОМО-Илинден Пирин нагласи дека на барањето за одржување на еден настан во Благоевград, тамошниот градоначалник одговорил дека партијата мора да оди во Македонија за да го организира случувањето.
Според ОМО-Илинден Пирин, медиумите во Бугарија често пати користат дезинформации за Македонците во Бугарија. Партијата ги информирала претставниците на ЕФА дека во Бугарија се проширила информацијата за наводен обид на ОМО-Илинден Пирин да ги подмити Ромите и Турците во градот Гоце Делчев со 50 лева (24 евра) за да ги собере потребните потписи за регистрација.
Георгиев категорично ги отфрла таквите тврдења, нагласувајќи дека партијата и нејзините членови се наоѓаат во незавидна финансиска состојба. Тој побара од ЕФА да интервенира во ЕУ со цел како услов за влез на Бугарија во Унијата да се постави и признавањето на македонското малцинство.

Eurolang